విశాఖపట్నంలో భాను అచూకీపై ఆకాశరామన్న లేఖ కలకలం

 మద్దెలచెర్వు సూరి హత్య కేసు నిందితుడు భాను కిరణ్ ఆచూకీపై విశాఖపట్నంలో కలకలం సృష్టించింది. ఓ ఆకాశరామన్న లేఖ ఈ కలకలానికి కారణమైంది. బుధవారం రాత్రి మీడియా కార్యాలయాల బాక్సుల్లో ఆ ఆకాశ రామన్న లేఖలను వదిలి వెళ్లారు. భాను కిరణ్ సూరి హత్య జరిగిన మరుసటి రోజు నుంచి విశాఖపట్నంలోని కిర్లంపూడిలో ఉన్నాడంటూ ఆ లేఖలో ఆగంతకుడు తెలిపాడు. భాను కిరణ్ ఉంటున్నట్లు చెబుతున్న నాలుగు ఆపార్టుమెంట్ల పేర్లను కూడా ఆగంతకుడు ఆ లేఖలో తెలిపాడు.

ఆకాశరామన్న లేఖతో విశాఖపట్నంలో పోలీసులు గస్తీని ముమ్మరం చేశారు. అపార్టుమెంట్లలో సోదాలు నిర్వహించారు. ఆ ఆపార్టుమెంట్లలో కొత్తగా చేరినవారి వివరాలు సేకరించారు. భాను కిరణ్ గతంలో విశాఖపట్నంలో కూడా భూముల సెటిల్మెంట్లు జరిపాడని ఆరోపణలున్నాయి. అయితే, మీడియాను, పోలీసులను తప్పు దారి పట్టించడానికే ఆ ఆకాశ రామన్న లేఖ రాశారని భావిస్తున్నారు.