అందాల సుందరి ఐశ్వర్యరాయ్ ఏం చేసినా టాపిక్కే. సినిమాలు చేసినా వార్తే.. చేయకపోయినా వార్తే. ఆమె మీద ఉన్న క్రేజ్‌కి ఇదొక నిదర్శనం. ప్రస్తుతం ఐష్ గర్భవతి అన్న సంగతి తెలిసిందే. ఇన్నాళ్లూ ఆమె నటించిన సినిమాలు గురించిన మాట్లాడుకున్నవాళ్లు ఇప్పుడు ఆమె జన్మనివ్వబోతున్న బిడ్డ గురించి చర్చించుకుంటున్నారు. బచ్చన్ కుటుంబం మాత్రం తమ కుటుంబం జాబితాలో చేరబోయే బిడ్డ కోసం చాలా ఉత్సాహంగా ఎదురు చూస్తోంది. అమితాబచ్చన్, ఆయన సతీమణి జయాబచ్చన్ తమ కోడల్ని అపురూపంగా చూసుకుంటున్నారట. అభిషేక్ అయితే... తన బిడ్డ ఇంటికొచ్చేవేళ నాకంతా కలిసొస్తుందని, ఇక తను చేయబోయే సినిమాలన్నీ వరుస విజయాలను సాధిస్తాయని ఆనందంగా చెప్పుకుంటున్నారట. అత్త, మామలు, భర్త కనబరుస్తున్న ప్రేమాభిమానాలకు మురిసిపోతున్న ఐశ్వర్యరాయ్ పుట్టబోయే బిడ్డ కోసం అన్ని జాగ్రత్తలు తీసుకుంటున్నారు. వీలైనంత ప్రశాంతంగా ఉంటున్నారు. అడపా దడపా దేవాలయాలను కూడా సందర్శిస్తున్నారు. అలాగే ఇటీవల ‘కర్వా చౌత్’ సందర్భంగా రోజంతా ఉపవాసం కూడా ఉన్నారు. ఉత్తరాదిన మహిళలు జరుపుకునే పండగ ఇది.
పెళ్లయిన స్త్రీలు భర్త ఆరోగ్యం, ఆయుష్షు కోసం కర్వా చౌత్ నాడు ఉపవాసం ఉంటారు. నెలలు నిండిన స్త్రీ రోజంతా ఉపవాసం ఉండటం అంటే మామూలు విషయం కాదు. సంప్రదాయాలకు విలువ ఇచ్చే ఐశ్వర్య ఈ ఆచారాన్ని పాటించింది. ఇదిలా ఉంటే ఐష్ కవలపిల్లలకు జన్మనివ్వబోతోందని కొంతమంది జోస్యం చెబుతున్నారు. మరికొంతమందైతే ఏకంగా బెట్టింగ్ ఆరంభించారు. మామూలుగా క్రికెట్ మ్యాచ్‌లప్పుడు ఏదో ఒక టీమ్‌పై బెట్ కట్టినట్లు ఐశ్వర్య రాయ్ డెలివరీ డేట్ గురించి ముంబయిలో బెట్టింగులు మొదలయ్యాయని సమాచారం. నవంబర్ నెలలో ఐష్ తల్లి కాబోతున్నారు.
వచ్చే నెల 11న ఆమె బిడ్డకు జన్మనిస్తే.. 11.11.11 అవుతుంది కాబట్టి అదే రోజు బచ్చన్ ఇంటివారు శుభవార్త వింటారని కొంతమంది బెట్ కట్టారు. బాలల దినోత్సవం నాడు (నవంబర్, 14) ఐష్‌కి డెలివరీ అవుతుందన్నది కొంతమంది వాదన. ఈ ఇరువర్గాలు బెట్టింగ్ రూపంలో భారీగా పెట్టుబడి పెట్టారట. బహుశా ఇలా జరగడం ఇదే మొదటిసారి అయ్యుంటుందేమో. ఏదేమైనా ఈ రెండూ ప్రత్యేకమైన తేదీలు కాబట్టి ఐశ్వర్య వీటిలో ఏదో ఒక తేదీనాడు అమ్మ అయితే బాగుంటుందని ఆమె అభిమానులు భావిస్తున్నారు.
Source:sakshi.com
No comments:
Post a Comment