ఒంగోలు: తెలుగుదేశం పార్టీ నాయకుడు, తన సోదరుడు నందమూరి హరికృష్ణ కుమారుడు, సినీ హీరో జూనియర్ ఎన్టీఆర్ గురించి కేంద్ర మంత్రి చిన్నమ్మ పురంధేశ్వరి ఓ మంచి మాట చెప్పారు. నటనలో తన తండ్రి ఎన్టీ రామారావు వారసుడు జూనియర్ ఎన్టీఆరేనని ఆమె శుక్రవారం మీడియా ప్రతినిధులతో అన్నారు. రాజకీయాల్లో మాత్రం జూనియర్ ఎన్టీఆర్ ఆచితూచి అడుగులు వేయాలని ఆమె సూచించారు. తెలుగుదేశం పార్టీ అధ్యక్షుడు నారా చంద్రబాబు నాయుడు ఎన్టీఆర్ కుటుంబ సభ్యులను కరివేపాకులా వాడుకుని వదిలేస్తున్నారని ఆమె విమర్శించారు. ఎన్టీ రామారావు కుటుంబ సభ్యులకు తన సహాయ సహకారాలు ఎప్పుడూ ఉంటాయని ఆయన చెప్పారు. రాజకీయాల కోసం ఎన్టీ రామారావు కుటుంబ సభ్యులను వాడుకునే సంస్కృతి తనది కాదని ఆమె స్పష్టం చేశారు. తెలుగుదేశం పార్టీ అధ్యక్షుడు నారా చంద్రబాబు నాయుడు ఆగడాలు పెరిగిపోతున్నాయని ఆమె వ్యాఖ్యానించారు. కడప, పులివెందుల ఉప ఎన్నికలు ప్రభుత్వంపై రెఫరెండం కాదని ఆమె అన్నారు. ఉప ఎన్నికల్లో భారీ మెజారిటీతో కాంగ్రెసు గెలుస్తుందని ఆమె ధీమా వ్యక్తం చేశారు.
యుపిఎ ప్రభుత్వ హయాంలో అవినీతి పెరిగిపోయిందనే విమర్శల్లో నిజం లేదని ఆమె అన్నారు. బిజెపి పాలిత రాష్ట్రాల్లోనే అవినీతి ఎక్కువగా ఉందని ఆమె విమర్శించారు.
No comments:
Post a Comment